ՈՒՍՈՒՑԻՉՆԵՐ

Արմենուհի Վարդանի Գրիգորյանը ծնվել է 1973 թվականին Լենինական քաղաքում (այժմ՝ Գյումրի)՝ մանկավարժի ընտանիքում։

1980 թվականին ընդունվել է Լենինականի Մազմանյանի անվան թիվ 35 միջնակարգ դպրոց, իսկ 1990 թվականին ավարտել է Ս. Շահումյանի անվան թիվ 3 միջնակարգ դպրոցը։ Ուսումնառության տարիներին ստացել է նաև երաժշտական կրթություն՝ ավարտելով Լենինականի թիվ 4 երաժշտական դպրոցը։ Այդ տարիներին եղել է «Դեղձանիկ» խմբի սան։

1990 թվականին ընդունվել է Գյումրու Մ. Նալբանդյանի անվան պետական մանկավարժական ինստիտուտ, որն ավարտել է 1995 թվականին՝ ստանալով հայոց լեզվի և գրականության ուսուցչի որակավորում։

1995 թվականից աշխատել է Գյումրու Մ. Նալբանդյանի անվան թիվ 11 միջնակարգ (ներկայում՝ հիմնական) դպրոցում՝ որպես հայոց լեզվի և գրականության ուսուցչուհի՝ մինչև 2012 թվականը։ 2013 թվականից նույն դպրոցում զբաղեցրել է ուսումնական աշխատանքների գծով փոխտնօրենի պաշտոնը։

2016 թվականի օգոստոսի 2-ին ազատվել է փոխտնօրենի պաշտոնից, իսկ օգոստոսի 3-ից նշանակվել է նույն դպրոցի տնօրենի ժամանակավոր պաշտոնակատար։ Նույն թվականին ստացել է ուսումնական հաստատության ղեկավարման իրավունքի հավաստագիր, իսկ 2017 թվականին ընտրվել է «Գյումրու թիվ 11 հիմնական դպրոց» ՊՈԱԿ-ի գործադիր տնօրեն։

Մասնակցել է մի շարք մասնագիտական վերապատրաստումների և ծրագրերի՝ ուղղված մանկավարժական և կառավարման հմտությունների զարգացմանը։ Հանրակրթության պետական նոր չափորոշչի արդյունավետ ներդրումն ապահովելու նպատակով մասնակցել է մասնագիտական տարբեր վերապատրաստումների և սեմինարների։

Հաջողությամբ ավարտել է ԿԶՆԱԿ հիմնադրամի կողմից կազմակերպված հանրակրթական ուսումնական հաստատությունների տնօրենների և տնօրենի տեղակալների վերապատրաստողների 30-ժամյա դասընթացը և գործունեություն ծավալել որպես մենթոր տնօրեն։